Nol iera triestin de nascita, el iera nato a Innsbruck, ma el ga vissudo anni a Trieste ( i ultimi anni credo a Roma), el ga lavorado qua, anche alle Generali, oltre che esser prof universitario. I sui legami con Trieste po iera anche che sua sorella Lora ( che credo sia ancora viva a Roma) iera la moglie del prof Marussi, altro matematico insigne, quel che iera detto K2 per gaver partecipado alla sezion scientifica della spedizion del 1954.
De Finetti xe famoso per la sua definizion de probabilità, che adesso vien insegnada abitualmente nei corsi universitari: savemo tuti che se tiremo una moneda ( non truccada) xe probabilità 50% de un lato e 50 % de l'altro ( scartando l'idea che la resti in equilibrio de taio
). E cussì altri casi. ma se le proprietà no xe cussì simmetriche?l'idea de De Finetti xe de partir dela sicurezza con cui se fa un'affermazion, come che mi posso dir "son sicuro al 100% che nasserà sta roba" o " son bastanza sicuro, ma te lo daria al 90%", o "no ghe scometessi gnanca un centesimo" e chi che conossi el mondo dele scomesse, per esempio dele corse dei cavai
, sa come che va sta roba. Ben, lu ga dado sta definizon "sogetiva" de probabilità disendo che la probabilità de un fatto ( evento, termine tecnico, una roba che nassi/no nassi) xe i bori che un trova giusto pagar ( o incassar) per ricever ( o pagar) 1 lira ( 1 euro, ve va ben, adesso?) se succedi quel fatto. Oviamente se un xe sicuro, meti probabilità 1 perchè el xe certo che dopo el ciaperà 1, se nol ghe credi nol meti fora gnente ( prob 0) e in mezo xe le vie de mezzo.Son arivada a farme capir o son stada un poco tropo noiosa? ma visto che sti giorni tuti parla de de Finetti ma no go trovado sui giornai la definizion, ve la go portada mi, che a suo tempo go studiado sui libri de probabilità de sto sior.
