Portoni

[ffdt]

A propoxito de architetura, gavevo tirado su c'o 'l scaner un poche de foto de portoni de la cita` ... stili diversi ... epoche diverse. Me par interesante e volevo far un lavor sai piu` serio ... no go rivado a continuar ma za che son meto sti cua e dopo se cualchedun el se zontera` ben che 'l vegni, ah

Comincio con un porton "clasico" de campagna ;-D ... mi me ricordo de gaverghene visti tanti de sti cua ;-D ... vedemo se la vostra memoria la xe come la mia ;-D

[ffdt]

Cuesta la xe in piaza liberta` a 'l numero 5 ... de solito se ghe pasa per davanti senza badarghe ma cua el iera iluminado de un bel sol a 'l tramonto e 'l risaltava bastanza ... peca` che una parte la iera in ombra

[ffdt]

Sempre de le parti de la stazion ghe xe cuesto, in scala al belvedere, che in principio no xe una scala ma una strada vera e propria. El xe bastanza mal ridoto, pero` se capisi de come che el iera fato ... tante volte se capisi meio de un toco roto che no de un bel intiero ;-D

Me par che el gabi una R e una G in fero ... ma no so chi che iera el paron de cuela caxa perche` el mio testo piu` serio no 'l ciapa cuela zona ;-D ... fusi de andar in comun a veder e so za che no faro` ;-D

[ffdt]

Cua xe un particolar de sto porton:

[ffdt]

Cuesto me pareva interesante per la gadela. El xe in via Giulia 53:

[ffdt]

Cuesta xe la caxa intiera ... bela anche cuela:

[ffdt]

Cuesto el xe tuto in fero, in via Pascoli n. 39 e no savesi definir el stile ... per mi el xe ecletico, che xe cuela parola che se dopra c'o se vol dir "misiot" ma parlando forbito ;-D

[ffdt]

Cua la roba particolar no xe tanto el porton, comuncue interesante, ma la scrita US che la xe la` de l'ultima guera. C'o iero picio me ricordo che ghe ne iera tanti e mio nono, papa` de papa`, el dixeva che iera per indicad l'uscita de sicureza: se el bombardamento el vigniva tropo in furia la gente la scampava in cantina e se la caxa la vigniva ciapada i socorsi i tacava a scavar la` indove che mostrava la frecia.

Credo che no gabi mai ocorso de far e no so se gavesi funzionado, pero` cuel che ne conta sto simbolo xe che cuela caxa iera de la guera che no i la piturava ;-D ;-D ;-D ;-D

La xe in via Roseti al numero 24.

[ffdt]

Eco cua ... sempre in via Roseti ma el numero 30. Cua xe vedi anche la tabela che le Generali meteva sora de le caxe che i asicurava ... xe roba vecia e difati la tabela la xe ruzine, ma iera scrito Assicurazioni Generali in tondo de sora e in grando in mezo 1831, che xe la data de fondazion de la dita. Ghe xe gente che studia ste tabele e se rivo zerchero` fora cualcosa per veder de darghe una data anche a cuela.

[babatriestina]

In fatto de portoni, ognidun ga i propri gusti: portoni come quei che te ga postado mi me par bastanza comuni, forsi perchè nela casa dove che son nata iera un del genere ( no el primo!! ), anca mi ghe ne go fotografai un pochi, ma me gavevo specializzado in quei liberty, che me pareva i più interessanti.
Zerto, ghe iera molti lavori de fero batudo, no so quanto artisti locali, come che penso, e quanto de fora. Anche i moderni ga spesso dei bellissimi lavori de fero batudo, me ricordo co xe andada al asta Villa Casali el atrio gaveva un grandioso finestron de fero batudo, a rose.
Posterò quel che go.
Interessante anca el discorso sule targhette dele Generali, anche mi le osservavo. E anche a volte dei veci numeri sule case, una numerazion precedente.
Anche la numerazion sule case a volte cambia, per esempio el porton col arco de piera in via dei Capitelli che adesso xe via dei Capitelli 1, nele guide de una ventina de anni fa iera via dei Capitelli 9 e prima ancora doveva gaver un altro numero.

[babatriestina]

eccote un per de portoni liberty che me ga ssai piasso, questi xe in zona Vial, vizin del Politeama Rossetti, no me ricordo el numero preciso, xe do:

pecà quel buso nel muro per la valvola in basso a destra
el secondo:

[babatriestina]

Alcuni particolari del secondo:
i fiori de fero batudo

e le decorazioni incise sul legno, che se trova spesso sui mobili de l'epoca ( primi anni del 1900) ma più de raro sui portoni

putroppo adesso spesso se vedi cambiar sti belissimi portoni con novi lissi

[babatriestina]

Ecove ancora un particolar de uno, in via Raffineria: xe la casa liberty del inizio de Novecento, quela coi mascheroni

[babatriestina]

Stavolta go trovado un vecio porton, in citavecia zona Tor Cucherna, più che el porton xe interessante l'architrave de piera. Xe l'anno 1748 e una scritta In te Domine speravi de un Salmo ( In ti Sioriddio go sperado) - el salmo continua ne confundar in eternum ( che no resto confuso per l'eternita). , xe una frase de bon augurio ogni volta che se va fora de casa. in Carso se vedi spesso ste architravi con una scitta o un bassolilievo augurante
Coi restauri, se li riva a leger meo

[AdlerTS]

Comincio con un porton "clasico" de campagna ;-D ... mi me ricordo de gaverghene visti tanti de sti cua ;-D ... vedemo se la vostra memoria la xe come la mia ;-D

Gotico ?

[babatriestina]

Comincio con un porton "clasico" de campagna ;-D ... mi me ricordo de gaverghene visti tanti de sti cua ;-D ... vedemo se la vostra memoria la xe come la mia ;-D

Gotico ?

Mi diria eclettico

[ffdt]

Per mi el xe architetura militar medieval ... sa ... esendo fato in maia de fero ;-D

Ma per eser piu` precixi diria che xe un puro stile "contadin moderno" ;-D ... se varde` i cancei de campagna in zone poco batude come che pol eser la parte interna de cherso se trova ancora cancei per le bestie fati tuti in legno poco lavorado.

La susta de 'l leto no xe altro che la version moderna e za pronta de cuel tipo de cancel la` ... no credo de gaver foto ma se ghe ne trovo ve meto.

In te le campagnete cua intorno xe ani anorum che no vedo piu` portoni fati de legno semplice ... e devo dir che anche portonzini fati c'o le suste xe sai che no li vedo piu` ... i se vergogna tuti ... oramai anche in campagna i varda l'estetica e no la funzionalita` ;-D

C'o iero picio iera pien de portonzini co' le suste ... xe finido un mondo.

Ciau ciau


Franco

[AdlerTS]

Casa de via Tigor 12, realizada tra el 1907 e 1908, opera dell'architetto Giovanni Maria Mosco.

[babatriestina]

La casa liberty de via Tigor 12 le la pol comentar sotto tanti aspetti: come casa liberty, per le statue in porton,.. e anca per el stato alquanto critico che i la lassa, ma za che semo là vedemo un di fronte, via Tigor 11, un bel portal liberty ( xe tuta una dele zone del liberty..)

[ffdt]

Casa de via Tigor 12, realizada tra el 1907 e 1908, opera dell'architetto Giovanni Maria Mosco.

Xe cuela indove che ani indrio i gaveva girado el film de "senilita`"


Ciau

Franco