Balletto: Giselle al Politeama

[babatriestina]

El prossimo fin setimana al Politeama i darà una version de Giselle, con balerini del Baletto de Cuba. Sto Balletto de Cuba xe stado creado e mantignudo de una balerina Alicia Alonso, che ga creado una tradizion classica molto bona. pol esser veramente un spetacolo interessante.
Giselle xe un baletto romantico dei ani Trenta del Otocento, el ga la caratteristica de esser sempre restado in repertorio de quela volta, i disi el più antico baleto balado sempre senza interuzioni. Perchè tanti altri baleti del Otocento, tipo La silfide, a un zerto punto xe stai lassadi perder e quel che vedemo xe una ricostruzion , fata de specialisti, de quel che doveva esser i passi del baleto originario.
Xe qualchedun qua che xe apassionado de baletto come mi?
( chissà che fin che ga fato federica..)
Volè un pochi de detagli su sto baletto?
( el xe stado dado al Verdi do anni fa con una compagnia russa, e nei anni 70 con la compagnia dela Scala e Nureyev, gaveva fatto scalpor su tuti i giornai italiani. perchè per qualche motivo . tipo zapamento de un pie o passo storto, Nureyev ghe gaveva dado un stramuson a una balerina. )

[babatriestina]

Visto oggi dopopranzo, meritava!
una compagnia no molto folta ( in zerte versioni ghe xe più gente in scena, ma in tournée se pol acetar), tecnica classica bona, forsi le punte dele balerine no iera ecezionali e un balerin un momento .. se ga pozado per tera, ma i ga balado ben con paasi dificili, scene e costumi classici non speciali, sugestiva la seconda scena quela de zimitero. I primi balerini bravi, e convincenti, adesso le balerine ga tute una tecnica che le buta le gambe in alto coi pie oltre la testa, che po in Giselle no ocoressi...
la coreografia iera una variante dela solita un poco adattada, con zerti passi fati anca più complicati, a mio parer. Tecnica propio tipo stile prima metà Ottocento
Insoma una bela storia de amor, anche se triste, in prevision de San Valentin.