Prepareve a guardar sta serie co gaverè bastanza tempo: ve averto che la xè 'ssai longa.
Due parole (se fa per dir) de introduzion.
L'albergo xè un edificio monumental progetà dal architeto austriaco Ladislaus Fiedler, inaugurà nel 1912. Quela volta el xè stà definì "il più importante e lussuoso hotel dell'Austria-Ungheria".
La faciata, decorada con statue e colone, vien delineada da ampi balconi che se afacia sul nostro golfo e i regala un imparegiabile colpo de ocio sul porto e sul castel de Miramar.
El totale restauro, che se ga concluso un piochi de giorni fà, ga seguido scelte architetoniche e estetiche che restituisi al edificio la maestosità e el rigor dele forme pur rimodernando l'interno per renderlo più funzional.
Le pareti interne xè rivestide con disegno e lavorazion classiche per ricrear l'atmosfera calda e discreta dei interni mitteleuropei.
Tutto ricorda l'impereggiabile stile lussuoso dei grandi alberghi che se stava imponendo ala fin del '800.
Le 142 stanze xè aredade in stile classico con spunti moderni utilizzando materiai de valor e eleganti come la pele e la seda, nei bagni xè sta usado el marmo 'Calacatta' (almeno cussì i disi: mi no lo go mai inteso nominar). Particolar cura xè stada messa nela scelta de tute le tapezzerie.
La "Cruise suite" (non visitabile) xè un apartamento de 106 mq. in stile nautico, che ricalca la cabina armatoriale de un grande yacht.
La zone che comprendi el bar, el ristorante e (penso) la grande sala convegni se afacia sul lungomar e dai ampi finestroni se godi de una spetacolare vista sul golfo.
El bar "Savoy lounge" ga un maestoso sofito a conchiglia decorado con stuchi e profili dorai.
El "giardino d'inverno", iluminà dal grande lucernario, riprendi el stile de fin '800, diventando, oltre che un punto de relax, una vasta biblioteca.
E adesso le foto:
Comincemo coi esterni; Le foto no xè recenti, ma oltre che una man de pitura e qualche ritoco ale malte, no xè stà modificà assolutamente gnente de l'architetura. (meno mal)
