Non meto in dubio che el gabi una funzion de istruir i orchestrali su come che el vol che i soni, su cosa che per lui vol dir pianissimo, cosa che vol dir andante, sempre per lui; perfin mi me inacorzo de quanto pol eser diverse due esecuzioni, stessa orchestra e direttori diversi. Ma una volta che el ghe ga spiegà, in fase de concerto, el servi? I orchestrali lo varda? A mi me pareva che i fusi tuti intenti a leger el spartito e che, de conseguenza i andasi avanti de soli.
E tuta quela gestualità un poco teatrale che i diretori fa la ghe servi ai orchestrali? Una volta dà l'attaco el servi ancora? Son profano e quindi me poso sbagliar, ma un poco go l'impression che, almeno in parte, sia una messa in scena. In definitiva anche in teatro de prosa el regista vien fora anche lui, ala fine a ciaparse i applausi, ma durante la recita no se lo vedi. Ocori veramente che el stia là a sbrazarse per tuto el concerto metendose el dito sula boca per dir che i devi sonar pian pian o la man sul cuor per dir che i ghe devi meter passion in quel che i sona e cusì via?
Questi xe i pensieri profondi de un profano che vardava un concerto per television...
