La xe del 46 o 47 e me ga fato tenereza veder mia mama con dei sandali bassi e i calzini (i se la pasava bastanza mal in quei anni). La borsa nera de mio papà che fazeva la foto la go ereditada mi un per de anni dopo. Ma la roba che me ga incuriosido de più xe sta el segnal de divieto che xe drio de lori. All'epoca no iera un model standard de segnai; per lo più li fazeva el Touring Club e solo nel 59, col novo codice dela strada gavemo vu dei segnai standard. Me ga colpido el pal, che adeso xe grigio e quela volta iera una serpentina bianca e blu (me li ricordo ancora).
E el cartel cosa vieta? Vieta el transito ai autocari, ai careti sburtai a man e a quei tirai de bestie. Ogi no, sti divieti, propio sule rive no i esisti più.
